VER VÍDEO RESUMO PINCHANDO AQUÍ
Tras presentarse cunha posta en escena en grao sumo rompedora cun flasmob na Praza da Quintana da Orquestra 430 e unha maridaxe entre o noso viño e a actuación de Davide Salvado, o I Festival Premios Martín Códax da Música deu a coñecer a súa completa programación que permitirá aos galegos gozar da mellor música da comunidade.
O festival desenvolveuse entre os días 15 e 17 de outubro en diferentes espazos de Santiago de Compostela, como a Zona C de Bonaval, o Centro Galego de Arte Contemporánea (CGAC), o Teatro Principal, Salón Teatro, Mercado de Abastos ou a Sala Capitol e incluia coloquios, maridaxes de música e viño e concertos dos gañadores do último certame.
O maratón de música abríase o xoves cunha charla debate sobre a situación do sector en Galicia de man dalgúns dos grandes profesionais. Ese mesmo día, chegaba a segunda maridaxe de viño e música coa actuación de “Dos fíos invisibles chegan as cores” e os primeiros concertos protagonizados polos grupos Cro e Sub Rosa.
O venres a boa música seguía sendo a protagonista en Santiago coas actuacións de Wöyza, Cuarteto Caramuxo e Sumrrá que presentaron novo disco e encheron de público o Teatro Principal.
A última xornada foi, sen dúbida, a máis completa de todas cun espectáculo infantil a cargo de Banda Tic Tac Toc, unha sesión vermú coa Orquestra Os Satélites e os concertos nocturnos de Ataque Escampe, Cats and Monkeys, Zamaramandi e Nao que poñían o broche de ouro a estes tres días de calidade musical.
