A miúdo encontrámonos con que o mundo do viño intimida a moita xente. Nós propuxémonos rematar con esta tendencia e descubrirvos un mundo que é moito máis doado do que parece a simple vista. Por iso, creamos este minicurso online, onde a través de varios artigos iremos analizando varios aspectos do viño e da cata, para que a próxima vez que vos enfrontedes a un novo viño, non teña segredos para vós. Estades preparados?
A Cata:
A cata é a práctica esencial para o coñecemento dos viños. Catar un viño é envorcar os sentidos co fin de emitir un xuízo sobre as sensacións que nos transmite.
Trátase de someter un viño aos nosos sentidos para chegar a coñecer as súas características, positivas e negativas, co fin de expresalas e identificalas. Polo tanto, o obxectivo non é máis que analizar as sensacións que nos produce ao degustalo. Por iso, a pesar das aparencias, catar é algo sinxelo.
Non se trata dunha área reservada só para expertos sumilleres, enólogos e iniciados na materia, se non que nós mesmos, nas nosas propias casas, podemos aproveitar cada botella de viño que abrimos e gozalo dun xeito diferente, con todos os sentidos ben espertos para captar todas as sensacións que o propio viño nos vai transmitir.
Como vedes, o coñecemento do viño non é un privilexio só ao alcance duns poucos senón que calquera coas suficientes ganas pode facelo, xa que simplemente se trata de seguir determinados pasos para lograr o obxectivo desexado e que a experiencia sexa proveitosa.
Agora que xa nos iniciamos, no próximo artigo falaremos dos diferentes tipos de cata que existen. Sabedes o que é unha cata vertical? E unha horizontal? Descubrídeo no próximo artigo de Aprender e Disfrutar catando.
